كيف أنقذتني نبتة؟ قصة التأسيس الكاملة للشركة

حكايتي بدأت من لمن كنت طالبة في الثانوية الرابعة في الطائف بالسعودية.. كنت طالبة مجتهدة.. ومثقفة ولأني بحب الكتابة كنت بكتب مقالات وتحقيقات صحفية لجريدة المسلمون وأتقاضى عليها أجر ولم أبلغ في ذلك الوقت الثامنة عشر بعد.. كانت تلك المبالغ المالية أول أجر مادي أحصل عليه من عمل في حياتي..

اتخرجت من الثانوي بنسبة ٩٠.١% وفي التقديم حصرت الرغبات مابين طب وصيدلة بس.. بناء على رغبة الاسرة

ولأنو بتم معادلة النسب في التعليم العالي تم خصم ١١% من نسبتي وبكده مابقيت مؤهلة لدخول كليات الطب والصيدلة في السودان.. بكدة ضاعت علي سنة التقديم

السنة التانية لمن جينا السودان نهائي امتحنت وجبت نسبة دخلتني زراعة الخرطوم عن رغبة

سألوني في المعاينة هل انت داخلة زراعة عن رغبة ولا دخلتك النسبة؟؟

قلت للدكتور المعاين أنا دخلت عن رغبة لأن عندي حلم أعمل مشتل زي مشتل زرتو في الطايف لمرة وحدة في حياتي وختة بصمة في نفسي اني لازم أمتلك مشتل زيو لمن أكبر

السنة ديك ما دخلت الجامعة

لأنو جا قرار من الجيش انو خريجين الثانوي يندرجو في الخدمة الالزامية قبل ما يخشو الجامعة ما بعد ما يكملو الجامعة

وهو قرار نفذ لسنة وحدة بس وكانت فيه دفعة عزة السودان الأولى

يعني لحدة هنا أنا متعطلة عن دخول الجامعة ل ٣ سنوات

السنة الاولى قدمت للجامعة وما اخدوني لانهم خصمو من نسبتي بالمعادلة

السنة التانية امتحنت وجبت نسبة دخلتني زراعة جامعة الخرطوم

السنة التالتة برضو ما دخلت لانو دفعة أولادنا ودوهم يحاربو في الجنوب باسم عزة السودان الاولى

لمن دخلت الجامعة اتخصصت تقانة حيوية مع انو حبي لزراعة كان لبساتين..

بعد الجامعة طرقنا أبواب العمل الحكومي وتم تجاهلنا لان التوظيف كان للمسيسين من الحزب الحاكم أيام الجامعة

عمليات الرفض المتكرر للتوظيف لأسباب عدم الانتماء السياسي وعدم وجود مصدر دخل وعدم القدرة على التطور واكمال الدراسات العليا وعدم وجود حياة كريمة..

خلق لدي حالة اكتئاب حادة ورغبة أكيدة في الانتحار..

خذلني في الانتحار أداة التنفيذ..

فأنا ليس لدي الشجاعة الكافية لانهاء هذه الحياة الهزلية

فكنت كل ليلة ارقد فيها في السرير بدعو ربنا بقوة انو الاغماضة دي تكون الاغماضة الاخيرة..

ولمن أصحى الصباح من النوم كنت بفضل أبكي في السرير لما يقارب الربع او النصف ساعة لأنو ربنا ما استجاب الدعاء ومنحني الاغماضة الاخيرة

فضلت على الحالة دي لحدة ما يوم أبوي حن علي وقال لي تعالي معاي. مشوار..

ساعتا أبوي وداني لمعرض الزهور ..وهناك شوفت كائنات ظريفة اسمها زهور وورود وطيور وأسماك زينة

حسيت انو الدنيا ما انتهت زي ما انا كنت فاكرة وانو الدنيا لسه فيها حاجات حلوة ممكن تتعاش..

هنا اتحسنت نفسيتي ورجعت البيت وقلت فكرة الانتحار لدي بديت أتسلى بالكمبيوتر العندنا في البيت...

ولأن النت متوفر اتعلمت من النت الفتوشوب بدون معلم ..

واتعلمتو اساسا عشان أصمم صور حلوة لي وأحتفظ بيها للذكرى .. يعني ما اتعلمتو لغرض الوظيفة او التكسب المادي

في يوم أنا بقلب في موقع توظيف لقيت اعلان مطلوب بنت بتعرف فتوشوب..

مشيت وقدمت واشتغلت معاهم لمدة شهر ..

كان صاحب العمل وافد أجنبي من دولة شقيقة وكان بقدم خدمات اعلان عبر السوشيال ميديا للشركات والمؤسسات

اتعلمت منو طريقة عمل جديدة

بعد شهر سافر وما اداني مستحقاتي المادية

كانت صدمة بس قدرت اوقف على رجلي سريع لانو علمني طريقة محترمة اكسب بيها رزقي

ومن هنا بدأت رحلتي كfreelancer بقدم خدمات تصميم جرافيك للشركات والمؤسسات

ولأنو كان بداخلي حلم كبير وهو اني امتلك مشتل زي الشفتو في الطايف انشأت اسم عمل من دخلي في. الجرافيك ديزاين سميتو أصيص وزهرة جالري

وهو مشتل الكتروني عبر منصة الفيس بوك

وما حأبالغ لو قلت إنو كان أول مشتل الكتروني قدم خدمة النباتات كهدايا وللمكاتب في سوق العمل في الخرطوم

لكن حقيقة ما بعرفا الأغلبية انو ظهرو مقلدين للفكرة وأصبحو منافسين لأصيص وزهرة جالري..

ولأن كان في عيوب في طريقة الادارة والتسويق وقلة رأس المال العامل لأصيص وزهرة جالري ما قدرت المؤسسة تقاوم التغيير السريع الحصل في سوق النباتات في السودان رغم انو هي بنفسها الأوجدت وخلقت التغيير ده.. فكان لازم نعيد استراتيجيتنا بفكر جديد وهو خلق مؤسسة جديدة تنهض من الرماد ومن هنا ظهرت وولدت Agropea

ويدوب ما بدينا مع أجروليا دورت الحرب

وانقطع مصدر الدخل عبر تسويق النباتات

وانقطع مصدر الدخل عبر تصميم الجرافيك

وكنت محاصرة في منطقة دعم سريع والطلعة كانت صعبة للامي وابوي االله يرحمو اللي اتوفى ايام الحرب في البيت واختارنا اننا نقعد في البيت وما نهاجر

هنا كان لازم ابدا افتش عن مصدر دخل آخر

طرقت الأبواب سائلة لحدت ما قدمت استشارة للدكتور محمد التاج الخبير والاستشاري الاداري

سألتو ..

أشتغل شنو وانقطعت كل سبل العيش..

قال لي قدمي دورات اونلاين

فكرت انا ممكن اقدم (بحب) دورة في شنو ؟؟

اكتشفت اني بفهم كتير في الطاقة الروحية وبمارس التأملات لحدة ماوصلت لمقامات عالية في السلام الداخلي والتنوير

وعندي صفحة بكتب فيها عن رحلتي دي اسمها كرامة الكارما وفي ناس كتيرة بتدخل تسألني كيف نتعلم التنوير والسلام الداخلي..

سألت الاستشاري محمد التاج..

هل ممكن أعمل دورات في الطاقة الروحية؟؟

قال لي اجابة بسيطة فتحت لي طاقة نور ومصدر دخل محترم ومقدر فترة الحرب

فقال لي ببساطة نعم ممكن..

بقت المشكلة اقدم الدورة دي كيف للسودانيين وهم بيعتقدو انو علم الطاقة الروحية ده شرك

في محاولة مني للتسويق داخل السودان أنشأت قروب تسويق

ويادوب ما نزلت ليهم عنوان المحاضرو وتعال شوف الهجوم اللقيتو من المسوقين

انو انا بعلم الناس أوامر مخالفة للدين وشركية

فطلعت من الجروب السوداني ده وقررت اعلن عن دورتي دي لاخوانا العرب

اللي هم أصلا متطورين روحيا وبفتشو عن بوصلة ودليل

والحمد لله كانو بالنسبة لي خير مساند

وكنت بكسب خلال فترة الحرب بالدولار وشايلة نفسي والحمد لله لأني كنت مستقرة في بيتنا ومنظمة وقتي وجهدي وعندي غرفة خاصة بعد فيها للدورات وبسجل منها..

وفضلت على كده لحدة ما دخل الجيش منطقة المربعات واجبرنا على الاخلاء والنزوح

وهنا بقى مسماي (نازحة) بعد سنتين من الحرب كنت عايشاهم بسلام روحي ووفرة مادية

ورغم انو اقامتي بعد الخروج من المنزل كانت في بيت اقاربنا الى إني فقدت كتير من حياة الاستقرار الكنت عايشاها في بيتنا والخصوصية.. وبالتالي بقيت ما قادرة انفذ دورات جديدة وأسجل تسجيلات تأملية للبيع..

فكان لازم أغير الخطة وأعيد ترتيب أوراقي من أول وجديد..

وهنا بدأ التفكير بطريقة ال Model thinking

What is

What if

What works

What wow

What next

وفي الحقيقة الطريقة دي ساعدتني كتير في اختصار الزمن

فعشان أعرف what if جربت اكتر من خيار

طلب اللجوء

البحث عن منحة

البحث عن فرصة عمل في الخارج

العودة لتصميم الجرافيك

العودة للدورات والتأملات

العودة ل Agropea

ومن بين كل ال what if دي لقيت انو اللعودة ل Agropea هي البتجاوب على السؤال what works

وبتحقق الاجابة الاقوى ل What wow وفيها مستقبل مبشر لأننا بنقول بعد what wow بنقول what next

لكن السؤال الأهم تعتقدو أجروبيا بعد الحرب بدأت برأس مال كم؟؟

عايزة أقول ليكم انو كل المبالغ المتبقية معاي من الدورات استثمرتها في ادخال طاقة شمسية عشان أشغل اللبتوب لانو ده مصدر رزقي الوحيد في كل الأحوال

بعدها وتحديدا من يوم ١ مايو ٢٠٢٥ لحدة يوم ٩ مايو

انا لا أملك غير ٢٠٠ جنيه ودقدق🤣 في حسابي في بنكك

يعني حسابي حرفيا صفر

وكان لازم اتصرف بأي شكل عشان ألاقي مصدر دخل..

وفي محاولة خجولة مني بديت احيي صفحة اقروبيا الكانت ععامل 7000 متابع ودقدق🤣

بديت انزل صور اتسليت بيها الفترة الفاتت وانا بعاني من ضيق الازمة المالية

الصور دي بصراحة عملتها لنفسي من باب التسلية وكأني بقول

لو جاني عرض

ايه رايك تصممي الياسمين الاصفر كده

كنت حرفيا بتسلى

لمن نزلتها في الصفحة نزلتها بصورة خجلة بس من باب تنشيط الصفحة على استحياء

لقيت تفاعل كبير من الناس

وناس بدأت تطلب

الزمن داك انا ما عندي غير ٢٠٠ بس ودقدق🤣 في الحساب

ففكرت سريع لمن الناس بدأت تطلب

بقول ليهم ببساطة

ادفعو عشان اجيبا ليكم

ومن الفكرة البسيطة دي اتولدت اجروبيا ما بعد الحرب

بفهم عميق

وروح مدروسة

واستراتيجية بقاء طويلة الامد

واستراتيجية منافسة للمنافسين الحتخلقهم اجروبيا لنفسها

لسبب بسيط اني فترة ما قبل الحرب حصلت على دورة تدريبية من ال British council

بعنوان

Social enterprise upscale

وفيها اتعلمت انو البزنس الصح لازم يكون مبني على أخلاق تدعم المجتمع والبيئة على حد سواء

وفعلا دي كانت رسالتنا في Agropea واللي هي خدمة البيئة وقضاياها للتقليل من الانبعاثات الحرارية الضارة بالكوكب وكانت رؤيتنا ومازالت خلق سودان أخضر يكون رئة للعالم لتنفس الأكسجين..

عشان كده احنا في كل شتلة حتى لو كانت صغيرة فاحنا لمن بنبيعا بنبني حلم أخضر لسودان أخضر

أجروبيا بالأرقام

بدت براس مال ٢٠٠ ج ودقدق🤣

كانت بتملك صفر شتلة

وصفر موقع لان المشتل الكان قبل الحرب موقع ضربتو ار بي جي وحديدو اتطاير وحاليا ماوصلاه أي موية

وصفحة فيها ٧٠٠٠ متابع ودقدق🤣

وبتملك موظف واحد مسماه دوليا (نازح) و هو المالك والمؤسس والبائع والمسوق ومصمم الجرافيك وكاتب المحتوى والمحاسب والاستشاري والمهندس الزراعي والتقني والدلفري للشحنات السفرية

وبتملك جهاز موبايل واحد مجنده من خلالو برامج ذكاء اصطناعي كموظفين لخدمة الشركة

أجروبيا بدت بعد الحرب يوم ٩ مايو برأس مال ٢٠٠ج ودقدق🤣 ويوم ٢٣ مايو أشترت متجر الكتروني من أرباح أجروبيا

ويوم ٢٧ مايو اطلقت الموقع واستقبلت أول طلبية نباتات عبر الموقع

وبعد ٢٢ يوم فقط باعت٩٧ شتلة ودخلت تدفق مالي بقيمة 706,000

وحققة نسبة ١٠٠% أرباح مبيعات

وبدت تتلقى عروض لاندسكيب من مؤسسات وشركات

وفي حوالي عشرين يوم حصلت على أكثر من ٢٠٠٠ متابع جديد لصفحتا على فيسبوك

من هي أجروبيا؟ Agropea هي كيان لشركة ريادة أعمال مجتمعية Social enterprise entity مختصة بأعمال ال landscape وتأهيل وصيانة المسطحات الخضراء.

و Agropea هي اسم تجاري مشتق من كلمة Agro اللاتينية التي تعني الزاعة

وكلمة pea التي هي اختصار ل professional educational area

أجروبيا حلم بدأ من زيارة صبية صغيرة لمشتل ببلد الغربة .. وعاش لسنوات لينبعث فيما بعد الحرب من تحت الرماد ليناضل.. ليبقى.. ويعيش وينعش الحياة لما بعد الحرب.

رانيا رمضان

مؤسسة والمدي التنفيذي

Agropea

جميع الحقوق محفوظة © Agropea 2025

لا يُسمح باستخدام هذا الأسلوب أو تحويله إلى مادة إعلامية أو تسويقية أو تجارية دون إذن كتابي مسبق.